Final Pre-Infantil 2006!

Dia : 10 desèmber 2006 Wega # 16 Resultado: 0-12

Despues ku e wega kontra Scarlet(#15) a para ayera, komo tereno tabata muha dor di awa seru,
Awe nos a siña e lès mas importante di deporte: Nos mester sosegá kurpa pa hasi deporte!
Ora CBS i Scarlet tabata di fiesta na Mc.Donalds, yamada a drenta for di Moccasin, si CBS ta bin hunga, tabatin ora robes riba skedjel. Ku barika yen di batata, nuggets, hamburger etc. CBS a Sali kurí pa bai wega. CBS no por a defendé e hecho ku nan a hinka kareda den tur wega, apesar ku nan ta tin base yen den promé i segundo inning. Despues di wega e muchanan a keda pa tuma nan premio.
Nos ta yama tur hungadó pabien pa hunga un tremendo kampeonato.

Picheo :

Cedanne”Dani”Rafaela a haña e honor pa habri e último wega di kampeonato 2006, manera e la hasi hinter kampeonato e la subi balentemente pa hasi e trabou. Den di tres, despues di hopi lansamentu, e ta wòrdu relevá pa Mackelthy Blijden e picher ku a duna nos e promé viktoria di 2006.

Bateo:
Mackelty Blijden ta evitá pa nos haña un no hit no run, konektando di hit!


“Player of the game”:
Mackelthy Blijden

Mayornan i fanatikada CBS:
Danki pa e sosten durante kampeonato.
Kòrda keda traha i stimulá bosnan yu, pa nan no kai atras pa otro aña!

Bon Pasku i Feliz aña Nobo!

CBS ta keda hinka kareda!

Dia : 3 Desèmber 2006 Wega # 14 Resultado: 3-13

Tremendo partido kontra e fuerte ekipo di Ipiranga, ku ta na promé lugá. Despues ku nan a gana nos ku skor grandi den e promé wega, nos a bini duru pa nan. Nos a logra sera e promé inning sin kareda, pero den di dos defensa a laga nos pichernan na kaya i nan ta hinka 11 kareda.
Pero un biaha mas, nos ta logra anotá kareda, pues nos no a konosé blankeo ainda den kampeonato!


Picheo :

No mester a uza 5 picher awe, pa dominá e fuerte ekipo di Ipiranga, i nos a logra den gran parti. Anwar Campagnard ta habri wega sin permiti kareda den prome inning i tur e pichernan ku a releva ( Cody, William, Cedanne i Machalthy) a hasi e trabou ora nan a drenta wega.

Bateo:

Tabata difísil bati e picher i e la tira 7 ponche siguí! Pero ku un doblete oportuno,
Rhafalyed Merencia ta kibra e blankeo


“Play of the game”:
Den di dos inning Mishendrick Maduro ta para un linea fuerte, na tersera base, pa di dos out di inning! Esaki ta bira e :“Play of the Game”!

“Player of the game”:
Sin diskushon e player of the game ta Rhafalyed”Rafi”Merencia, ku su doblete bari base, ora nos tabata na rand di K.O. den kabes di di tres inning, perdi 0-11!

Mayornan i fanatikada CBS:

E week-end aki nos ta bai haña e último partidonan di kampeonato.
Bin na bòshi pa apoyá CBS!

Racha viktorioso a kibra!

Dia : 26 Novèmber 2006 Wega #13 Resultado: 1-12

Nos a sali fuerte pero dos inning malu ta laga nos sin chèns pa bin bek i nos ta haña K.O.

Picheo :

Despues di sali fásil for di promé inning, tirando tres ponche, Cedanne”Dani”Rafaela nos picher habridó, ta konfrontá problema den di dos i Rylison Bentura ta relevá te den di kuater inning ora e tambe ta kansa un tiki. Finalmente, Anwar Campagnard ta bin trata di para e bateadornan di Breez’s, pero e no ta logra.

Bateo:

Maske ta un hit so nos a bati den wega aki, e último dos week-endnan nos a bin ta swing i mishi ku e bala hopi. Esaki sigur ta un bon desaroyo! E hit tabata un RBI single di Cedanne Rafaela

“Play of the game”:

Den di dos inning riba un bataso ku etikèt di pika bai di doblete den center, William Plaate ta bai patras ku spit i ta rèk i piki e bala pa e di dos out di inning!
E la haña hopi aplouso i komentario pa e hugada a la Andruw Jones.

Nos racha ta sigi!

Dia :25 Novèmber 2006 Wega #12 Resultado: 9-7

Despues di a gana nos promé wega siman pasa, nos a sigui e racha di viktoria awe!
Ku hopi konfiansa nos a sali bati den e promé inning i 10 hungadó a bai bati! Nos a kue bentaha ku nos no a entrega mas, pa gana nos di dos partido.

Picheo :

Awe otro futuro picher a debutá den gran forma! Coach a duna Anwar Campagnard e bala pa picha i ora ku e la haña plato e ta tira 3 ponche i sera e promé inning. Den di dos inning e ta sali poncha e promé bateador pero no por a sera e inning i Mackelthy Blijden ta drenta pone òrdu ku dos ponche.

Bateo:

Raylison Bentura den promé inning ku basenan yen por poko ta konektá un Grandslam! E ta kuminsá un rally di 7 kareda ku su doblete. Cedanne Rafaela den bòm di tres ku e wega empatá na 7 ta konektá hit empuhador ku ta laga e ekipo di Change’s den tereno!

“Play of the game”:

Game winning hit di “Cedanne Rafaela”.

“Player of the game”:

E tim kompletu di “Caribbean Bakery Suplies”

Mayornan i fanatikada CBS:

Danki pa a bai selebrá ku e muchanan na Mc.Donalds!

Gana ta gana te den port’e Shon’a rei!

Dia :19 Novèmber 2006 Wega #11

Awe nos a konosé nos promé viktoria!
No manera nos lo a deseá, pero pa motibu ku e ekipo di Refineria Isla no a presentá.
Coach a usa e tempu pa nos train un tiki ± 1 ora i despues nos a sera e dia numa.

E promé triunfo ta pintando na horizonte!

Dia : 18 Novèmber 2006 Wega #10 Resultado: 3-5

Un wega di tres inning ku nos a bringa te na último. Despues di kai atras tempran 4-0 nos a lucha yega serka pero ta kai chikí.

Picheo :

Mishendrick Maduro ta habri pa nos, pero no por a sera su inning y Mackelty Blijden ta subi i pone òrdu 1-2-3! Despues di sera di dos inning ku tres ponche sigui, ku base yen, den di tres Maidrickson”Bogi-Bogi”Brunken ta relevá i sera e inning ku base yen 1-2-3 e tambe!

Bateo:

Awe si nos a wòrdu silensia kompletu, ni un hit.


“Play of the game”:
Despues di wòrdu relevá den di tres inning, riba un linea violento ku etiketa di doblete empuhador, Mackelthy Blijden ta par’é i kasi ta kue un dòbel play su so!

Promé wega segunda buèlta.

Dia : 12 Novèmber 2006 Wega #9 Resultado: 3-6

Un biaha mas nos muchanan ta duna un tremendo partido!

Picheo :

Awe Cody Helena a debutá komo picher! Despues di a tira no ménos ku tres inning den su debut e ta haña yudansa di Cedanne”Dani”Rafaela ku ta sera e di 4 inning ku dos ponche!

Bateo:

Awe si nos a haña hopi ponche(10). Pero, den nan ta tin un 2B oportuno di Rhafalyed”Rafi”Merencia ku ta empuhá e promé 2 karedanan! Den e último entrada atrobe Rafi ta empuhá 1 kareda mas.


“Player of the game”:
Rhafalyed”Rafi”Merencia ku su 3RBI!

Último wega di promé buèlta.

Dia :11 Novèmber 2006 Wega #8 Resultado: 1-11

Un wega ku a bai 3 inning so. Nos muchanan a bringa balente i un biaha mas ta sa di anotá un kareda. Pues te ainda nan no a wòrdu blankea!

Picheo :

Cedanne”Dani”Rafaela un biaha mas ta tuma e bal i ku kurashi ta bai henter e ruta tirando 5 ponche! Tene kuenta ku ne den 2007!

Bateo:

Nos a poncha sinku biaha so i Michendrick Maduro a bati un doblete fuerte. Den e último turno ku dos koredor na base tur e tres bateadornan a hinka e bala den wega pero lastimamente nan no por a empuha e karedanan.

Palisa!

Dia : 4 Novèmber 2006 Wega #7 Resultado: 1-30

Awe si, nos no ta tin kaminda di skonde. Tur bala tabata haña un buraku pa pasa duru bai.
Un nota positivo ta ku te ahinda den tur wega nos a nota kareda, nos no a perde pa blankeo!
Mañan, djadumingu, nos por sosegá, pa prepará pa e último wega di buèlta number unu, otro siman.

Picheo :
Nos picheo simplemente no por a wanta e fuerte ofensiva di e ekipo di Ipiranga.

Bateo:
Nos bateo a wòrdu silensia den e partido aki ku a bai 2 inning so.
Nos hungadónan no a haña chèns pa topa ku e picher pa di dos biaha, e la skapa!

“Play of the game”:
Riba un linea violento, ku etiketa di bari base, Raylison Bentura ta fildea den gran forma na tersera i por poko ta kue un dòbel play! E ta risibí hopi aplouso pa su “Play of the Game”!

Mayornan i fanatikada CBS:
For di awe bosnan por subi www.statty.com i mira sifranan di nos ekipo CBS!
Klick: Little League-Pariba-PreInfantil (U-8)-Tra’i Seru/CBS.

Importante!
Huntu ku nos E-Korant, bosnan ta risibí un score sheet. Otro siman djabièrnè lo mi biaha, komo coach, ku nos ekipo Cat Power di L.L. pa Venezuela. Mi mester di mayor ku ta skore e weganan ku mi no tei (11-12-18 Òktober). Pa asina mantené e sifranan korekto pa nos muchanan riba e web site!
(Si un mayor ke usa su mes skore sheet tambe ta bon).
Mi ta spera ku mi por haña koperashon di bosnan, si no e sifranan no tin balor mas.

Tremendo partido!

Dia :29 Òktober 2006 Wega #6 Resultado: 1-5

Awe nos a hunga kontra e fuerte ekipo di Breeze’s i nos mester a usa 4 picher.
Nos bateo no tabata kayente manera siman pasa. Pero asina mes, nos a tene e wega perta te na final!

Picheo :
Cedanne”Dani”Rafaela a habri wega den gran forma sakando e promé outnan 1-2-3!. Den di dos inning e ta konfrontá un tiki problema pero ta sa di sera e inning tirando un tremendo ponche. Rhafalyed”Rafi”Merencia ta debutá den di dos pa CBS pero, no por a dominá e emoshonnan di e promé partido. Quendryson”Quin” Reinilia ta drenta, pone òrdu ku dos ponche i ta sera e inning den tremendo forma. Den di sinku e ta bin kansa despues di 60 lansamentu i William Plaate ta drenta i ku 4 lansamentu ta sera e inning fildeando un rolling i un flai pa asina kaba ku e menasa di Breeze’s.

Bateo:
Cedanne Rafaela ta los awe i bai di 3-2 ku un kareda empuhá i Raylison Bentura ta keda kayente ku un hit den e partido, e ta komandando e bateo di CBS, batiendo .307 (13-4).
William Plaate ta mira su racha di 5 turno poniendo e bala den wega kòrta, ku ponche.

“Play of the game”:
Ku tremendo esfuerso Jadon Virginia ta sali kaptura un foul ball te dilanti dugout.
E ta risibí hopi aplouso pa su “Play of the Game”!


Mayornan i fanatikada CBS:
Si nos alkansá e mínimo di 10 mayor abonado(=GRATIS), pa segunda buèlta, nos lo kuminsá pone potrèt den nos E-Korant!

Kasi e prome viktoria!

Dia :28 Òktober 2006 Wega #5 Resultado: 2-3

Weganan emoshonante e week-end aki. Poniendo tur mayor na punta di nan banki!
Djasabra, den un tremendo partido nos ta kai chikí pa un kareda ku basenan yen den último inning.


Picheo :
Mackelthy Blijden ta bai e ruta kompletu!
Despues ku Vandis ta hinka 3 kareda den e promé 2 inningnan, e ta sera porta pa nan i saka 7 di e último 8 bateadornan out i e último 5 nan di wega, tirando 4 ponche sigui!

Bateo:
Rhafalyed Merencia ta konektá su promé hit ku ta resultá tambe e promé doblete di CBS!

“Play of the game”:
Riba un linea fuerte, Nahzjir Geertruida ta reakshoná, fildea i saka e último out den di 4 inning!


Mayornan i fanatikada CBS:
Pa E-Korant sigui sali nos méster yega na mas mayor abonado!
( te ainda nos tin 3 so!)

Nos ku Nos!

Dia :22 Òktober 2006 Wega #4 Resultado: 2-8

Awe nos ta tin e fiesta di Tra’i Seru, ora ku CBS a enfrentá Scarlet.
CBS ta sali anotá trempan, hasiendo coach Angel Brunken, mal nervioso. Te e ta manda coach Neto, ruman di Cedanne Rafaela, bai papia ku su picher, pasombra e no tabata por mas ku nervio. Ta te ora wega a kaba nos a mir’é sali bek for di dug-out!
Dushi wega nos ku nos!

Picheo :
Quendryson Reinilia ta habri i ta tira un bon promé inning, den di dos e la bin kansa un tiki, pero ta sera e inning. Mishendrick Maduro ta debutá komo picher den di tres inning i ta hasi un bon trabou.

Bateo:
Awe nos bateo a los ku 4 hit!
Raylison Bentura ta sigui ku su racha kayente, bateando di 2-2 ku un doblete empuhador di e promé kareda. Jadon Virginia ta konektá doblete empuhador den di tres, ku tambe ta su promé hit di 2006! Mishendrick Maduro ta sigui mesora ku su promé hit di aña.

Mayornan i fanatikada CBS:
Sigui apoyá nos muchanan positivamente.
Pa E-Korant sigui sali nos méster yega na mas mayor abonado!

Di dos Week-End!

Dia :21 Òktober 2006 Wega #3 Resultado: 3-4

Djasabra, CBS ta enfrentá Abrahamz despues ku áwaseru kasi ta para e wega den promé inning, den un partido emoshonante ku ta wòrdu disidí den e último inning! Despues di tabata atras 0-3, den di kuater inning CBS ta rally pa empatá e wega na 3 kareda, pero Abrahamsz ta anotá un biaha mas den di sinku i nos ta keda kòrtiku. Tremendo wega i e muchanan a sintínan mes bon!

Picheo ku no ta tembla pa basenan yen!:
Cedanne Rafaela, ta sali for di e promé dos inningnan tirando 2 ponche ku basenan yen! Despues di 2 ponche mas den di tres inning Raylison Bentura ta relevá ku ponche pa sera e inning i ta pinta un tremendo sero den di kuater inning ku 2 ponche ku basenan yen! Den di sinku e ta haña relevo di Mackelhty Blijden ku tambe ta sera e wega tirando 2 ponche ku basenan yen!

Bateo:
Pabien na Raylison Bentura ku ta konektá e promé hit di CBS di 2006 i despues ta anotá e promé kareda di CBS, ku ta kuminsá e rally ku ta empatá e wega 3-3 den di kuater inning!

“Play of the game”:
William Plaate, ta yuda su picher den di dos inning, ora ku e ta bula un koredó na segunda pa su promé “assist” riba un hit di e terser bate pa center.

Mayornan i fanatikada CBS:
Mi ta pidi mayornan pa lesa E-Korant, huntu ku bosnan yu. Esaki ta stimulanan den nan wega!
Tambe, kòrda e otro mayornan pa manda nan e-mail pa nan haña E-Korant!

Number 2.

Dia :15 Òktober 2006 Wega #2 Resultado: 2-10

Djadumingu nos a hunga nos di dos partido di week-end i di kampionato Pre-Infantil 2006.
Nos hungadónan a bini hopi motivá i desidido pa buska nan promé viktoria.
Lástimamente nos no por a sinti e sabor di e promé viktoria di CBS. Pero e muchanan tur tabata kontentu di nan promé week-end di wega despues di e hopi trainingnan!

Picheo:
Nos hungadó i picher mas chikí, na edat, pero ku e kurason mas grandi, Cedanne Rafaela, a subi testíkulo pa enfrentá e poderoso bateadornan di Change’s. E la habri tur dos inning tirando ponche i e la tira 4 ponche total. Quendrison Reinilia a relevá tremendo, silenciando e bateadornan sobra di e partido i ponchando e último tres bateadornan di wega ku base YEN pa sera e inning!

Bateo:
Change’s ta habri ku un picher ku hopi velosidat, kual nos no a kustumbrá ainda. Pero den di dos inning ku Maidrikson”Boggie Boggie”Brunken na tersera, Jadon Virginia ta linea e bala violentamente ku ta empuhá e promé kareda di wega i tambe asina su promé RBI. Den nos último turno Anuar Campagnard tambe ta bati un bala fuerte pa e tambe empuhá su promé kareda ora ku William Plaate anotá su promé kareda di kampeonato Pre-Infantil 2006.

Fildeo:
Den segundo inning Denzel Davelaar, nos di dos hungadó mas hóben, den rightfield ta drenta kòrta un bala, entreg’é na e segunda base i asina impedí e koredornan di avansá pa nos “Play of the Game”!


Mayornan i fanatikada CBS:
Nos ta yama danki na tur mayor i fanatikonan ku a bin pa apoyá CBS.
Kòrda pe muchanan yega wega i training trempan!

Weganan pa otro siman:
Djasabra 21 Òktober Ora: 12.00 kontra SCARLET!
Djadumingu 22 Òktober Ora: 12.00 kontra Abrahamsz.

Prome Wega 2006!

Dia :14 Òktober 2006 Wega #1 Resultado: 1-6

Awe e ekipo nobo di Tra’i Seru di spònser pa Caribean Bakery Services a debutá den e kampeonato Pre-Infantil 2006.
Despues di apertura, e promé enkuentro a bai entre nos ruman grandi Scarlet i Ipiranga. I pa 1’or nos ekipo a debutá kontra Elica.

Picheo:
Mackelhty Blijden a debutá i a bai e distansia kompletu pa e ekipo di CBS.
Despues di a surpasá e emoshon di su promé wega, e ta saka tur e outnan den 2, 3 i 4 inning,
pa via di PONCHE! Tremendo aktuashon i tirando solamente 2 Base por bola den e enkuentro.

Bateo:
Nos a topa un di e mihó pichernan di kampeonato i nos no por a hasi hopi kos awe.
Cody Helena a embasa 3 biaha ku B.B. i ta anotá e promé kareda di kampeonato pa CBS ora ku basenan yen William Plaate ku konteo di 3-2 ta haña HBP i ta empuhá e promé kareda di CBS pa 2006.

Fildeo:
Den loke ta bira “Play of the Game”, Cedanne Raphaela, riba un linea fuerte di e terser bate den promé inning, ta fildea espektakular pa e promé out di e partido. Hopi aplouso e la haña for di públiko!

Mayornan i fanatikada CBS:
Nos ta yama danki na tur mayor i fanatikonan ku a bin pa apoyá CBS.

Kòrda:
1. Sostené e ekipo kompletu.
2. Apoyá positivamente nos hungadónan.
3. Mantené un aktitut deportivo pa ku nos kontrinkantenan i nan fanatikada.
(Kòrda ta wega di mucha, no papia kos ku bo no ke pa nan papia den direkshon di bo
mes yu!)
4. E umpirenan lo faya (anto hopi) no laga esaki bira un tenshon extra pa e muchanan,
dor di komentario konstante for di tribuna.